​(ខេត្តស្ទឹងត្រែង)៖ នារសៀលថ្ងៃសៅរ៍ ទី០៧ ខែវិច្ឆិកា ឆ្នាំ២០២៦ ឯកឧត្តម សរ សុពុត្រា ប្រធានគណៈកម្មាធិការគណបក្សប្រជាជនកម្ពុជាខេត្តស្ទឹងត្រែង បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារទីស្នាក់ការគណបក្សប្រជាជនកម្ពុជា ឃុំចំការលើ និងពិធីប្រកាសបញ្ចូលសមាជិកថ្មីនៃគណបក្សប្រជាជនកម្ពុជា ចំនួន ៣៦០នាក់ ស្ថិតនៅឃុំចំការលើ ស្រុកថាឡាបរិវ៉ាត់ ខេត្តស្ទឹងត្រែង។

ស្ទឹងត្រែង៖ ដើម្បីសម្រួលដល់ការធ្វើដំណើរ និងការដឹកជញ្ជូនផលដំណាំផ្សេងៗរបស់ប្រជាពលរដ្ឋ មន្ទីរអភិវឌ្ឍន៍ជនបទខេត្តស្ទឹងត្រែង ក្រោមការចង្អុលបង្ហាញពីក្រសួងអភិវឌ្ឍន៍ជនបទ និងរដ្ឋបាលខេត្តស្ទឹងត្រែង បាននិងកំពុងអនុវត្តសកម្មភាពថែទាំ និងជួសជុលផ្លូវលំជនបទ ១ខ្សែ ប្រវែងសរុប ១០,៥ គីឡូម៉ែត្រ ដែលតភ្ជាប់ពីឃុំអូររៃ ទៅដល់ឃុំកាំងចាម ស្ថិតក្នុងស្រុកថាឡាបរិវ៉ាត់ ខេត្តស្ទឹងត្រែង នៅព្រឹកថ្ងៃទី ៧ ខែវិច្ឆិកា ឆ្នាំ២០២៦នេះ។

​នៅថ្ងៃទី៦ ខែវិច្ឆិកា ឆ្នាំ២០២៦ មន្ទីរធនធានទឹក និងឧតុនិយមខេត្តស្ទឹងត្រែង បានសហការជាមួយសហគមន៍កសិករប្រើប្រាស់ទឹក អនុវត្តការងារថែទាំ និងជួសជុលផ្លូវខ្នងទំនប់ប្រព័ន្ធធារាសាស្ត្រអូរពូក ប្រវែង ២ ៥០០ម៉ែត្រ ក្នុងឃុំកំភុន ស្រុកសេសាន ដើម្បីសម្រួលដល់ការធ្វើដំណើរ និងលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋាន។

(ស្ទឹងត្រែង)៖ ថវិកាបេឡាមរណសង្គ្រោះចំនួន ៤លានរៀល ព្រមទាំងគ្រឿងឧបភោគបរិភោគជាច្រើនមុខ ត្រូវបានក្រុមការងារសមាគមអតីតយុទ្ធជន និងនិវត្តជនកម្ពុជា ខេត្តស្ទឹងត្រែង នាំយកទៅប្រគល់ជូនដល់ខ្នងផ្ទះនៃគ្រួសារសពលោក ឌឹម សារឹម អតីតនិវត្តជនយោធា នៅស្រុកថាឡាបរិវ៉ាត់ នៅថ្ងៃទី០៦ ខែវិច្ឆិកា ឆ្នាំ២០២៦នេះ តំណាងដ៏ខ្ពង់ខ្ពស់ ឯកឧត្តម សរ សុពុត្រា អភិបាលខេត្ត និងជាប្រធានគណៈកម្មាធិការ អ.ន.ក. ខេត្ត ដើម្បីជួយសម្រាលការលំបាក និងចាត់ចែងក្នុងពិធីបុណ្យសពតាមប្រពៃណី។

(រាជធានីភ្នំពេញ)៖ នាព្រឹកថ្ងៃទី៥ ខែវិច្ឆិកា ឆ្នាំ២០២៦នេះ លោក ទូច គង្គា អភិបាលរងខេត្តស្ទឹងត្រែង តំណាងដ៏ខ្ពង់ខ្ពស់ឯកឧត្តម សរ សុពុត្រា អភិបាលខេត្ត បានដឹកនាំមន្ត្រីជំនាញចូលរួមសិក្ខាសាលាពិគ្រោះយោបល់ថ្នាក់ជាតិ ក្រោមអធិបតីភាពដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើសេចក្តីព្រាងផែនការយុទ្ធសាស្ត្រអភិវឌ្ឍន៍សហគមន៍ជនបទ និងការធ្វើពិពិធកម្មសេដ្ឋកិច្ចគ្រួសារជនបទ ឆ្នាំ២០២៦-២០៣៣ ដើម្បីរួមចំណែកផ្តល់ធាតុចូលសំខាន់ៗក្នុងការកសាងផែនទីបង្ហាញផ្លូវ លើកកម្ពស់ជីវភាព និងពង្រឹងសេដ្ឋកិច្ចពលរដ្ឋនៅមូលដ្ឋានឱ្យកាន់តែរឹងមាំ។

ខេត្តស្ទឹងត្រែង៖ នៅថ្ងៃទី០៤ ខែវិច្ឆិកា ឆ្នាំ២០២៦ ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង និងជាប្រធានគណៈបញ្ជាការឯកភាពរដ្ឋបាលខេត្ត បានអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តស្ទឹងត្រែង ដោយផ្តោតសំខាន់លើការពង្រឹងការអនុវត្តគោលនយោបាយភូមិ ឃុំ សង្កាត់មានសុវត្ថិភាព ព្រមទាំងការផ្សព្វផ្សាយខ្លឹមសារសេចក្តីជូនដំណឹង និងសេចក្តីណែនាំផ្សេងៗ ដើម្បីជំរុញការអនុវត្តតួនាទី ភារកិច្ច និងការទទួលខុសត្រូវរបស់អាជ្ញាធរ និងស្ថាប័នពាក់ព័ន្ធឱ្យកាន់តែមានប្រសិទ្ធភាព។