មន្ទីរពេទ្យបង្អែកខេត្តតាកែវ បើកផ្ដល់សេវាកម្មតេស្តពិនិត្យសុខភាពទូទៅតាមបែបទំនើប លឿនរហ័ស និងមិនចាំបាច់ឆ្លងកាត់ការចុះឈ្មោះរង់ចាំយូរ
តាកែវ៖ សូមស្វាគមន៍យ៉ាងកក់ក្តៅ ចំពោះបងប្អូនប្រជាពលរដ្ឋទាំងអស់ ដែលមានបំណងមកទទួលសេវាកម្មតេស្តពិនិត្យសុខភាពទូទៅ នៅមន្ទីរពិសោធន៍វេជ្ជសាស្ត្រ នៃមន្ទីរពេទ្យបង្អែកខេត្តតាកែវ! ដើម្បីឆ្លើយតបទៅនឹងតម្រូវការជាក់ស្ដែង ក៏ដូចជាការគិតគូរពីតំលៃពេលវេលាដ៏មានតម្លៃរបស់លោកអ្នក មន្ទីរពិសោធន៍របស់យើងមានសេចក្តីសោមនស្សរីករាយក្នុងការផ្តល់ជូននូវ «សេវាពិនិត្យសុខភាពទូទៅដោយផ្ទាល់» ដែលជាយន្តការថ្មី ជួយឱ្យបងប្អូនអាចមកទទួលសេវាកម្មតេស្តឈាម និងពិនិត្យទឹកនោមបានភ្លាមៗ ដោយមិនចាំបាច់ឆ្លងកាត់ដំណើរការចុះឈ្មោះស្មុគស្មាញជាមួយមន្ទីរពេទ្យឡើយ។ គោលបំណងធំបំផុតរបស់យើង គឺបង្កើតភាពងាយស្រួល ផ្ដល់ភាពស្រឡះចិត្ត និងកាត់បន្ថយពេលវេលារង់ចាំរបស់បងប្អូនឱ្យមកនៅត្រឹមកម្រិតទាបបំផុត។
