ព័ត៌មានក្នុងខេត្ត

តាកែវ៖ ក្នុងគោលបំណងតាមដានដិតដល់ពីសុខទុក្ខ និងជំរុញវឌ្ឍនភាពសេដ្ឋកិច្ចគ្រួសាររបស់ប្រជាពលរដ្ឋនៅតាមមូលដ្ឋាន នាថ្ងៃព្រហស្បតិ៍ ទី០៩ ខែកក្កដា ឆ្នាំ២០២៦ នេះ លោក គិន ភក្តី អភិបាលនៃគណៈអភិបាលស្រុកព្រៃកប្បាស ព្រមទាំងសហការី រួមដំណើរដោយអាជ្ញាធរមូលដ្ឋានឃុំ-ភូមិ បានអញ្ជើញចុះជួបសំណេះសំណាល និងពិនិត្យស្ថានភាពជាក់ស្តែងនៃការរស់នៅ ព្រមទាំងសកម្មភាពបង្កបង្កើនផលដំណាំពោត និងដំណាំរួមផ្សំផ្សេងៗទៀត របស់បងប្អូនប្រជាកសិករ ស្ថិតនៅក្នុងភូមិសាស្ត្រឃុំកំពង់រាប ស្រុកព្រៃកប្បាស ខេត្តតាកែវ។

តាកែវ៖ នាព្រឹកថ្ងៃព្រហស្បតិ៍ ទី០៩ ខែកក្កដា ឆ្នាំ២០២៦ នេះ នៅសាលប្រជុំរដ្ឋបាលខេត្តតាកែវ មានរៀបចំពិធីផ្សព្វផ្សាយច្បាប់ស្តីពី «ការហាមឃាត់អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម» ក្រោមអធិបតីភាពរបស់ លោកជំទាវ ឧត្តមសេនីយ៍ទោ សុខុន ស្រីល័ក្ខ នាយិកានាយកដ្ឋានហ្វឹកហ្វឺន និងបណ្តុះបណ្តាលជំនាញ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍បណ្ឌិត ផន ណារ៉ា អគ្គលេខាធិការអាជ្ញាធរជាតិអាវុធគីមី និង លោក យង់ សុវឌ្ឍនា អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម វ៉ី សំណាង អភិបាលខេត្តតាកែវ ដោយមានការអញ្ជើញចូលរួមពីសំណាក់មន្ត្រីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានជាច្រើនរូប។

(តាកែវ)៖ នៅក្នុងឱកាសចុះបើកយុទ្ធនាការទប់ស្កាត់ និងបង្ការជំងឺគ្រុនឈាម តាមរយៈការបាញ់ថ្នាំសម្លាប់មូស និងដាក់ថ្នាំអាប៊ែតតាមពាងទឹក និងជួបសំណេះសំណាលជាមួយបងប្អូនប្រជាពលរដ្ឋនៅភូមិព្រេច សង្កាត់រកាក្នុង ក្រុងដូនកែវ នៅព្រឹកថ្ងៃព្រហស្បតិ៍ ទី០៩ ខែកក្កដា ឆ្នាំ២០២៦ នេះ លោក វ៉ី សំណាង អភិបាលខេត្តតាកែវ បានធ្វើការណែនាំ និងអំពាវនាវដល់បងប្អូនប្រជាពលរដ្ឋឱ្យមានការប្រុងប្រយ័ត្នឱ្យបានខ្ពស់ចំពោះជំងឺគ្រុនឈាម ខណៈពេលដែលខេត្តតាកែវមានករណីជំងឺគ្រុនឈាមកើតឡើងចំនួនជាង ៧០ករណី ទៅលើមនុស្សចាស់ និងកុមារ។

ខេត្តតាកែវ៖ នៅព្រឹកថ្ងៃទី០៩ ខែកក្កដា ឆ្នាំ២០២៦នេះឯកឧត្តម វ៉ី សំណាង ប្រធានគណៈកម្មាធិការសាខាកាកបាទក្រហមកម្ពុជា ខេត្តតាកែវ អមដំណើរដោយសមាជិក សមាជិកាគណៈកម្មាធិការ នាយកប្រតិបត្តិសាខា អនុសាខាកាកបាទក្រហមស្រុកបាទីបានអញ្ជើញប្រគល់ផ្ទះថ្មីជូនគ្រួសារស្ដ្រីទីទ័លក្រជាទុគ៌តជនឈ្មោះ សាយ ទូច ដែលផ្ទះរបស់គាត់បានរលំដោយខ្យល់កន្ត្រាក់នាពេលកន្លងទៅ និងបាននាំយកអំណោយមនុស្សធម៌សាខា ចែកជូនគ្រួសារចាស់ជរាទីទ័លក្រចំនួន ១៣គ្រួសារ នៅភូមិរូង ឃុំក្រាំងលាវ ស្រុកបាទី ខេត្តតាកែវ។

តាកែវ ៖ លោក ហ៊ត មនោ អភិបាលស្រុកត្រាំកក់ និងជាប្រធានគណៈកម្មាធិការសមាគមអតីតយុទ្ធជនកម្ពុជា (អ.ន.ក)ស្រុក បានដឹកនាំក្រុមការងារ ចុះពិនិត្យ និងសួរសុខទុក្ខគ្រួសារអតីតយុទ្ធជន ដែលបានទទួលផ្ទះថ្មីរួចរាល់ជាស្ថាពរ ចំនួន ០១គ្រួសារ ឈ្មោះ មាស វណ្ណា រស់នៅភូមិព្រៃឈើទាល ឃុំតាភេម ស្រុកត្រាំកក់ ខេត្តតាកែវ។

តាកែវ៖ ដោយសារបច្ចុប្បន្នភាពបានឈានចូលដល់រដូវវស្សា ដែលជាពេលវេលាងាយប្រឈមនឹងការផ្ទុះឡើងនូវជំងឺគ្រុនឈាម ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានធ្វើការណែនាំទៅដល់អាជ្ញាធរមូលដ្ឋានគ្រប់លំដាប់ថ្នាក់ ព្រមទាំងមន្ទីរជំនាញពាក់ព័ន្ធ ឱ្យពង្រឹងវិធានការការពារ និងកម្ចាត់ភ្នាក់ងារចម្លងជំងឺដ៏គ្រោះថ្នាក់មួយនេះ។

តាកែវ៖ លោក ភួន ឈីម អភិបាលនៃគណៈអភិបាលស្រុកកោះអណ្ដែត រួមជាមួយសហការី បានអញ្ជើញចុះជួបសំណេះសំណាល និងសាកសួរសុខទុក្ខផ្ទាល់ដល់គេហដ្ឋាន ជូនដល់បងប្អូនវីរកងទ័ពចំនួន ៣រូប ដែលកំពុងបំពេញភារកិច្ចការពារបូរណភាពទឹកដីនៅសមរភូមិមុខ បន្ទាត់ព្រំដែនខ្មែរ-ថៃ ហើយបានសុំច្បាប់សម្រាកមកសួរសុខទុក្ខក្រុមគ្រួសារ នៅក្នុងឃុំរមេញ ស្រុកកោះអណ្ដែត ខេត្តតាកែវ កាលពីរសៀលថ្ងៃពុធ ទី០៨ ខែកក្កដា ឆ្នាំ២០២៦ ។

តាកែវ៖ ដើម្បីធានាឱ្យបាននូវប្រភពទឹកគ្រាន់គ្រាន់សម្រាប់បម្រើឱ្យការងារបង្កបង្កើនផលស្រូវរបស់ប្រជាកសិករ លោក ភួន ឈីម អភិបាលស្រុកកោះអណ្ដែត ព្រមទាំងសហការី បានអញ្ជើញចុះពិនិត្យស្ថានភាពជាក់ស្ដែងនៅស្ថានីយបូមទឹកបន្ទាយធ្លាយ និងប្រព័ន្ធស្រោចស្រពដំណាំស្រូវ ស្ថិតនៅក្នុងភូមិសាស្ត្រឃុំព្រៃខ្លា ស្រុកកោះអណ្ដែត ខេត្តតាកែវ។

លោក​ កង អាណាន់ អភិបាលស្រុកអង្គរបូរី បង្ហាញការគាំទ្រ និងលើកទឹកចិត្តយ៉ាងខ្លាំងដល់ម្ចាស់សិប្បកម្មទូកស្មាច់នៅឃុំគោកធ្លក ដែលជាកូនខ្មែរផ្ទាល់ ក្នុងការបង្កើតអាជីវកម្មនេះឡើង។

ឯកឧត្តម​ វ៉ី សំណាង ​​​អភិបាលខេត្តតាកែវ ណែនាំមន្ត្រីជំនាញពាក់ព័ន្ធទាំងអស់​​ បង្កើនសកម្មភាពចុះត្រួតពិនិត្យសុវត្ថិភាពចំណីអាហារ ក៏ដូចជាមុខទំនិញគ្រប់ប្រភេទ នៅតាមបណ្តាផ្សារ និងសាលារៀនក្នុងខេត្ត ។

លោក​ ឌឹម គឹមសាន ណែនាំដល់លោកអធិការដ្ឋានក្រុងថ្មី ត្រូវតែមានវិធានការក្តៅទប់ស្កាត់ និងបង្ក្រាបឱ្យបានជា ដាច់ខាតនូវករណីក្មេងទំនើង គ្រឿងញៀន និងបទល្មើសផ្សេងៗទៀត ដើម្បីធានាភាពសុខសាន្ត គ្មានការភ័យខ្លាច និងទទួលបានទំនុកចិត្តខ្ពស់ពីប្រជាពលរដ្ឋ​។

ដូនកែវ៖ នាព្រឹកថ្ងៃពុធ ទី០៨ ខែកក្កដា ឆ្នាំ២០២៦ នេះ លោក សោ សុផល អភិបាលរងនៃគណៈអភិបាលក្រុងដូនកែវ បានដឹកនាំមន្ត្រីការិយាល័យជំនាញពាក់ព័ន្ធ រួមជាមួយអាជ្ញាធរសង្កាត់រកាក្នុង ចុះ សម្របសម្រួល និងបើកឡើងវិញនូវផ្លូវសាធារណៈមួយខ្សែ ដែលមានទំហំទទឹង ៦ម៉ែត្រ និងបណ្ដោយប្រវែង ២០០ម៉ែត្រ ស្ថិតនៅក្នុងភូមិច្រេស សង្កាត់រកាក្នុង ក្រុងដូនកែវ ខេត្តតាកែវ។